In de Grundschool an Wald in Sievershütten und uck in Struvenhütten ward in Rahmen vun de oppene
Ganzdachsschool uck een Plattkurs vun Volker Schmidt anboten. Dormit dat nich son drögen Ünnerricht, blots mit Vokabeln lehrn und dorbi de ganze Tied opn Stohl sitten is, hät de Dozent sien Vebindungen na de Kreisjägerschapp Sebarch nutzt und mol Nistkasten-Buusätze för sien Schölers ordert. De wurrn denn vun de Kreisjägerschapp kostenlos to Vefügung stellt. Een Unnerrichtsstunn wurr dorvör nutzt erstmol de vörhandenen Nistkastens opn Schoolhof to kontrolleern. Utrüst mit Schietammer, Leller und beeten Warktüch gung dat över de Schoolhof und de Nistkastens de noch gut wärn, wurrn sauber mockt, de nix mehr döögen deen, wurr affnohmen. Jedeen durf dorbi Hand anleng. De Schiet wurr ordnungsgemäß entsorgt.
In de nächsten beiden Ünnerrichtsstunnen wurrn denn mit Begeisterung de Buusätze för Höhlen- und
Halfhöhlenbröter tosomenklütert. Dor hät dat denn heeten:" Ick bruuk de Hamer, kannst mi mol de
Knieptang langen, dörf ick de Halfhöhlenkasten buun oder de Starenkasten har ick gern usw.!Meist
allerdings fungen de Sätze Hochdüütsch an und müssen denn vun de Dozent korrigeert warn, aver
insgesamt leep sick dat torecht und de Stunn wär gauer rum, as manch eener dacht hät.
Jedeen kreech denn een Nistkasten mit na Huus und för de Schoolhoff wärn uck noch wöck över.
Volker Schmidt (Presseobmann im Hegering VIII, Dezember 2023)
